Es esch doch jedes Joor es Highlight, met em Peter Schwander uf d'Schämpisfahrt - im Bola steit ... findet nicht statt ...de Peter het e Achillessehne-OP hender sech u fallt us ...das geit doch ned - de Leiter Markus Schmid rettet üs. Sächs unverfroreni Manne ässe wie jedes Joor Wienerli met ere warme Suppe vor em Iwassere. De Markus Gilli esch scho vorus met sim WW-Kajak. Gmeinsam fahre mer under dr See- u Chappubrügg düre bis is Zöpfli. Touriste us auer Wäut schnappe üs met ihrne Kameras - die woghalsige Wüudsöi! De watschle mer ums Naturmuseum bes zor breite Stäge i d'Rüss. De Kajaker Markus ned schüch fahrt grad  met sim Hochstart d'Stäge nidsi u sprüzt alli a, zwievellos de schnäuscht Iistieg! De Rolf Hefermehl het de ir Strömig sis Seekajak ghörig müesse stütze, si Première ire Clubfahrt, ou ohni z'kenntere - es wär de ned nume chaut gsi, de Ruedi hets total im Griff gha! Chaut hei mer de Schämis gnosse churz vor dr Imündig vor chliine Emme. De hei mer im Rathausenwehr umtreit. Trotz Wehrwasserchlau hets guet Wasser gha, i rassiger Fahrt gäge Bisluft hei mer üs scho uf e Uststieg in Perlen met warmem Punsch gfreut! Ir heimelige KCL-Baragge hei mer de es guets Fondue gnosse - scho ned z'vergliiche met Schwanders 5-Gangmenüe! Ime ne Joor esch es de weder traditionell!

Schriberling ond Fotograph "de Fred", e fule Sack im Kanadier met em Turboatrieb Armin